للشعب ذاكرة الصمود
شعر/دكتور معز عمر بخيت
يا حسرة البلد الشِبع
من دم جراح لون الأسى..
وطعم النهار الباكي حرقة
وشايل الأحزان عمايم لابِسا..
كنداكة زي موج البحر
فاتحة الشوارع مدرسة
أعظم شباب قاد المواكب
والمداين ترّسا
أطفال صغار ،، ورجال كبار
ربات بيوت ،، وملايكة حور
وزهور على قلب الطريق
بينم سحابةْ ونرجسه
ومطر مبارك وانتصار
لي ثورة شعبنا فارسا
صاحي وموشح بالبريق
من الصباح حتى المِسا
لا شمسو غابت لا انزوت
بين الغمام متوجسة
فليسقط الباغي الأثيم
ويسقط العسكر عسى
يتقدم البلد الحزين
ويرحل تخلفنا المهين
بين انقلاب وخطط سراب
وزمن عذاب
باللوعة والحسرة اكتسى
أرحل وسوق جهلك معاك
تور الخلا الشايل الحطب
ناهب الدهب
سارق مواعين الوطن
جاب المحن
والمواجع كرّسه
يا شعب لا أبداً ولنْ
ما في ردة ورجعة تاني
وما في غتغيت
أو مواره ودسدسة
ح نجيبو حق أم الشهيد
نبنيهو تاني وطن جديد
لا انقلاب،،
لا كاكي مشؤوم لا خراب
قالِب حياتنا وعاكِسا
لا أمة محزونة وغياب
عن عالم اتوحّد رسا
بين التقدم وبين رحاب
بين نهضةْ شعبنا كايِسا
غرقان ووحلان في الرمال
ساكب دموع متأسفة
على خير شبع من هم ضياع
على مجد ضاع
بس ما اتنسىَ
ح نجدد العهد النبيل
ح نعيد سماتنا ونحرسا
شاعر ومطرب وفني صوت،،
صحفي إعلامي وطبيب
زارع وصانع وزول أصيل
مش كوز رذيل
فيه البلاوي مكدَّسة
ست شاي وعاملات في البيوت
ربة منازل وأم عيال
كاتبة عمود ومهندسة
نبنيك يا وطني العظيم
نبنيك بالعلم الجليل
بالحب وبالصبر الجميل
كل المبادي الغارِسه
بين المسام،،
في الدم وفي الروح في العظام
ما فينا زمرة مسيَّسة
ما بينا غيرك وما بكون
بلد اتصنع من نور عيون
من سحر طاغي ومن فنون
من ثورة ماجدة مقدسة
