شعر/عبدالوهاب هلاوي
بي ياتو حق بي ياتو دين؟
مين علمك حمل البنادق
بين حقول الياسمين
ما شقشقت عصفوره اصلاً
غير لعشها والفضا
ما غردت غير النسيم
أمطار وغيم
موسم رضا
ما طالبت غير بي سراحا
ولون صباحا
بي ياتو دين تكسر جناحا
وتنسى رب العالمين
معقوله وانت وليد صغير
لا ليك خال
لا ليك عم
لا مره دقيت الجرس
لا مره غنيت للعلم
صفقت لي عبداللطيف
أو زرت ريرة
الجو خريف
معقوله لا قراك معلم
علمك مسك القلم
حفظك
والحصه دين
معقولة لا كان ليك صحاب
ولعبت بي كورة شراب
ما سمعت بي مريخ هلال
او شفت سانتو..وقاقرين
معقولة ما حبيت في يوم
فرحت يوم
وحزنت يوم
وسرحت بتعد النجوم
غنيت مع عثمان حسين
هل انت صليت جمعة واحدة
جمعة واحدة ورا الامام
ما سمعت كيف
دم كل مسلم..
مالو ..
عرضو عليك حرام
او مرة حسيت باليقين
بي ياتو حق
بي ياتو دين
مين علمك ضرب البنادق
بين حقول الياسمين
مين علمك رفع المشانق
بين حقول الياسمين
عبدالوهاب هلاوي
