تكتب //////
د احمد الطيب إبراهيم
الدنيا دي دلوكا
اعرض فيها و زح لي اخوكا
بقلم الدكتور / علي بلدو
حصل شفتوا ليكم زول برقص جنب الفنانين من بداية الحفلة لحدي نهايتها ؟
الا يكون مريض نفسي او متخلف عقليا و ديل الاتنين معذورين من ربنا ومن الناس أجمعين ..
و لانه السياسي السوداني في الغالب لا يخرج إلا من هاتين الفئتين يظل يراوده حلم العودة لنفس كرسيه السابق رغم أنه طوال فترة إقامته لم يحقق الا مكاسب واهية أو وهمية و بعد ما قام من الكرسي كسره و طلع ميتينو ….
__ انا متأكد تماما أنه حمدوك عنده احساس أنه ح يرجع رئيس وزراء و الشعب ح يطالب بيهوا لكن صدقني ده ما ح يحصل لانه ام جركم ما بتاكل خريفين .
__ و متأكد تماما أنه عمر البشير بعد أن طلع من كوبر الي فندق علياء الطبي الآمن تراوده بعض الاحلام أن يطلع الشعب في مسيرات هادرة ليأتي به للحكم و يهتف ( ضيعناك و ضعنا معاك يا البشير …. وسير سير يا البشير )…
الم يقل لكم ابن عوف ( تم اقتلاع رأس النظام و التحفظ به في مكان آمن ) الأمن الذي لم ينعم به الشعب السوداني حتي علي ابواب قيادة القوات المسلحة .
__
زي سرب القماري صعدنا
في لحظة وقوع الطامة
إتوسمنا خير وقعدنا
في جحر الأفاعي السامه
شن طعم القيادة بعدنا
شن معناهو طولة القامة
في القلعة المشيد سورا
قايلين الوراها نشامه
في ذاكرة شعوب محفورة
في صدر المعارك شامة
تبت دوشكتا المأجورة
تاكل من حلالا حراما
تتلامع سماحة صوره
وأولادنا بتموت قداما
__ كذلك يحلم محمد طاهر أيلا أن يعود بموازنات قبليه و كم كيلومتر ظلط أنشأت بورتسودان و مدني و إنارة بعض الشوارع تم تكسيرها أيام الثورة يحلم أن يعود رئيسا للوزراء بقرار عسكري ..
__ واعتقد و بعض الاعتقاد كفر عديل كده أن تصريح البرهان بأنه البلد ما فيها حكومة بدليل استقبال أيلا وهو مطالب قضائيا هو من باب ( انا ما جبتوا لكن الشعب هو الجابوا و لو طلعتوا قلتوا دايرنوا رئيس وزراء بكرة بعينه ليكم و ده ما قراري … تحت فقه
( سوف اذهب الي السجن حبيسا و اذهب أنت رئيسا ) .
الم اقل لكم أن السياسين السودانين أما متخلفين عقليا أو مرضي نفسيين .
__ وين علي بلدو ؟
عليك الله يا بلدو وعليك الخوة البيناتنا بدل تعمل ليك مدرسة لتعليم الرجل السوداني الرومانسية وهو معدم مرهق كرهان روحه و روح حواء السودانية ذاتها سوق الناس الحكموا والحاكمين السودان والمتطلعين لحكم السودان و ابدا معاهم علاج … يا اخي ديل عذبونا وحيرونا و بلونا و مرضونا وفقعونا و ……..ووووونا ذاتو ..
ابدا معاهم اول حاجة علاج بصدمات الكهرباء ( ECT ) اي واحد فيهم اديهو جرعتين تلاتة كهرباء في رأسه و حوله لي جراحين المخ والأعصاب بعد كده خليهم يفتحوا رأسه يشوفوا فيهو مخ وللا عجين ساي . ..
انا واثق ما حتلقي في راس اي واحد منهم ربع مخ سمكة سمكة عمر اسبوع .
__ يا اخوانا الناس ديل لو عندهم طايوق ممكن يختوا وزير ماليه كل خبراته أنه حركة مسلحة قتل و اعدم ونهب في أهله في دارفور التي يقاتل باسمها وهو زول قال داير وزير مالية بس يا ما داير …
طيب يا سيدنا يوسف مسكوك خزائن السودان أن شاء الله رأيت سبع بقرات سمان يأكلهن سبع عجاف …
__ يا اخوانا الدنيا دي دلوكا اعرض فيها و زح لي اخوكا مافي عرضتين الحكم ده زي العمر و واحد متا خلاص تاني مافي عمر جديد __ يعني مافي بعاتي ممكن يموت و يرجع تاني يقول كرسيني و ينو ؟
__ نيابة عن الشعب السوداني أرحب بعودة أبناء السودان الكيزان العائدين من تركيا ومافي زول ممكن يقول لي ما أبناء السودان … البلد دي حقتنا كلنا الصالحين مننا والفاسدين و من حقهم يرجعوا و يطلعوا متي ما أرادوا ولكن من حق الشعب أن يفتح قضايا الفساد و يتقدم بالشكاوي للقضاء …
طبعا القضاء السوداني ده فاسد ما في زول ما عارف الحقيقة دي لكن اقلاها تكون الملفات والأدلة وصلت المحكمة و البرأته المحكمة الفاسدة لا يبرأه الله ولا الشعب السوداني …
بعدين يا اخوانا الجماعة ديل موش نحن ذاتنا كنا معترضين علي انهم هربوا او سافروا و كنا بنشعر بي حسرة لما نشوف جواز واحد مأشر خروج من مطار الخرطوم .
—- خلوهم يرجعوا و يشوفوا وزنهم الحقيقي وهم خارج السلطة او خلف السلطة ومن وراء حجاب .
__ حتي العقل الجمعي السوداني زاتو مريض و متخلف و غير واعي و الدليل علي كده الحزبين اللدودين المتشابهين و المتطابقين في الممارسة السياسية و استغلال القوة العسكرية للوصول للسلطة (الكيزان و الشيوعيين ) ما زالا. يطمحان لحكم السودان مرة اخري ….و ده مستحيل لن يحكم السودان الكيزان ولا الشيوعيون مرة أخري ولكن بإمكان أي منهما أن يجعل حياة الشعب السوداني جحيم عن طريق الدسائس السياسية … و بإمكان أي حزب منهما أن يشارك بكوادره الغواصات أو من الصف التالت و تحت برنامج لا يحمل بصمتهم الأصلية ( ومالو نحن لا نعترض علي الأشخاص ولكن نعترض السياسات ).
__ وايضا قحت لن تعود بكوادرها السابقة التي اقصت المناضلين و جاءت بالشلة و صاحبي و صاحب و ود قعدتي و ود قعدتكم في إدارة المرحلة السابقة فالينظر الجميع برؤية مستقبلية واقعية و ايضا الحاكمين الان عارفين لو ذحوا منها ما بعرضوا فيها تاني لكن تبقي سنة. الحياة اعرض و زح لي اخوكا .
ولو ما زحيت بتجي اللحظة التي يتم فيها ازاحتك غصبا عنك .
و دمتم سالمين
د احمد الطيب إبراهيم
استشاري جراحة الكلي والمسالك
