سيما الجاك تكتُب:- مَشيت الحجّ وأثناء درس عن عذاب القبر نُمتَ وسط النسوان لحد ماشَخرتَ
بقلم/سيما احمدحسن الجاك
2006 لمن “ابونا” قال عاوز يحج قلت ليهو اصلك ما بتمشي بدوني وانا اقعد بعدين افتش في اليحججني. الحج كان ديسمبر ٢٠٠٦ وعلي ولدي مولود ليهو ٦ شهور بس. عملت المستحيل وقلبت هوبة عشان اخطط كيف اقدر احج ومعاي اطفال. الوقت داك كانوا بيدو اماكن محدودة في الحج الداخلي للزوار للسعودية..ما عارفة اذا الحاجة دي لسه في والا لا. امي وقتها كانت شغالة في جامعة الملك فيصل في الدمام. اتسهلت لينا التأشيرات ومشينا ليها زيارة نزلنا الاولاد وجبنا ليها مساعدة منزلية وحجينا مع حملة سعودية داخلية اسمها (الشلوي). طبعاً القصص البنسمعها عن الحج الوقت داك كلها تعب ومرض وهرس. اختكم من فكرنا في الحج نزلت الجيم بجدية ورفعت لياقتها ومشيت بس يوسف عبدالفتاح رامبو🏃🏽♀️
الحملة كانت اول اختلاط لي بالسعوديين. كانت تجربة انترستنق محتاجة كتابة براها. اهم العبر اني اتعلم كظم الغيظ ومسك اللسان وعدم الجدال في الحج …يوم في المخيم لبست جلابية بيضا قاموا يتعاوروا ويتدسدسوا مني قالوا ده تشبه بالرجال وقايلني رجال🙄
ما علينا! اهم حاجة شلتها معاي كانت البتاعات الزي الفلين البيسدو بيهم الاضنين من الصوت ديلاك. اول ليلة بعد صلاة العشا النسوان استعدلوا قالوا في درس عن غسل الميت وعذاب القبر. انا زولة عندها ٣ اطفال الوقت داك. اخرهم رضيع وبيكون لي زي ٤ سنين ما نايمة زي الناس. غزغزت فليناتي وفي نص الغسل داك شخرت ليهم. زوجة اخوي قالت لي الناس منططة عيونها والنوم طاير ليها وانتي تشخري. يعني زول عمل ده كلو ومشي لبيت الله بشق الانفس يقطعوا قلبو بعذاب القبر لشنو؟ بركة في النوم. صحيت الصباح قبل الفجر رااايقة لمن ريالتي كابة ومخلوعة انا وين….اي زول ما مصدق انو عدم النوم وسيلة عذاب يساهر اسبوع مع طفل رضيع. المهم الصباح الناس ديل عندهم الشاي بانواعه (واتعرفت علي ابوقوس بالهيل 😋 ) والقهوة والفطور بوفيه حار اشكال والوان اغرف واكل لا غسيل عدة لا شفع أكلهم. بعد داك نمشي نعمل المفروض يتعمل بس فولو زا لييدر…اركبو انزلو صلوا قولوا. ما صدقت لقيت بس زول سلمته مخي واستعدلت للاسترخاء. واذا في ركوب بصات انووم في البص ونرجع بالليل اعيد الكرة بالفلين وانووم ملء جفوني. عذاب قبر واحد ما طقش اضاني والحمدلله. كل ما أضرب لأبوي اقول ليهو ما فاهمة الناس دي بتشكي من شنو؟ انا حاسة بروحي في اجازة وريزورت ٥ نجوم. يقول لي يحليلك امريكا هردتك لمن مشقة الحج بقت ليك اجازة.
جد كانت حجة لطيفة الحمدلله والجو في ديسمبر الطف ما يكون.
وعشان كنت مرتاحة كان فيها درجة عالية من الروحانيات والونس مع نساء من مختلف بلاد العالم. شي بالإنجليزي المكسر وشي بالاشارة. قابلت في نص الملايين دكتور سوري درس معاي قبل سنين في بوسطن.
صبحنا يوم العيد علي خبر مقتل صدام حسين..اتذكر كان مزيج غريب من الحزن والاحساس بالذنب علي الحزن ده…عليه من الله ما يستحق.
الوحيدة من باقي المجموعة الرجعت بدون “نزلة الحج” او انفلونزا ومربية لي جضوم. الشعب الذي لا يرضي الا ان ينغص عليك ويحسد الاعمي علي طول عكازو قالوا لي المرض بعد الحج علامة قبول! اأو. الحمدلله القبول من الله ما من البشر.
انيواي، مرت مياه كثيرة من السنة ديك..الحمدلله السهلو وقدرنا عليه ونصيحتي كل واحدة تلقي طريقة وهي صغيرة وبعافيتها تمشي وما تخلي زوجك يفوتك!
تقبل الله من الحجاج
تعليق ذكرني الفيلم ده عن اب مغربي في فرنسا اصر انو ولده الشاب يسوقه بالبر الي مكة. رحلة عجيبة ومؤثرة بين الولد وابوه الما كان بينهم اي علاقة قبل كده. جهزوا مناديلكم
