يا سلام بالله شوفوا تعليق الأستاذ المحامي عبد العزيز الفكي على عمود أوتاد الذي حمل عنوان من أمير إلى عبد الله
نقول تحيا مدني 👇👇👇
أمير.. وأنابخاف من الجنا جداد @
الحبيب الأديب الاريب ابوعكرمة دمتم بالحفظ والصحة… فعلآ الأستاذ أمير التلب يعتبرعصره ومسرح الجزيرة مدني كعهدالنهضةالأوربية في كافة ضروب ومناحي الحياة الثقافية والإنسانية والاجتماعية خاصة في جانب المسرح
الذي كان على رأسه ود التلب… وكما ذكرت اخي ابوعكرمة شهد مسرح الجزيرة حينها نشاطآ وحركة رآئدةغير مسبوقة وابسط دلالاتها وصول فرفةالمتحدون المسرحية لمدني بقيادة الزعيم عادل امام بكامل الطاقم الفني وتوابعه… استغرق عرض مسرحية شاهد ماشافش حاجه
قرابةالشهر… حلت ونزلت الفرقة بفندق أمية بلاس
قبالة شارع الجمهورية مدني.. حيث كان العم والأخ سليمان منقة مسؤول قسم الأغذية بالفندق… وهو من ناس فداسي الحليماب… ولقب بمنقة لحلاوة روحه وطيبة كلامه ودوام ابتسامه َودومآ على لسانه… يا منقه انت… والذي يميزه ايضآ ودومآ زيه السوداني الأصيل الجلابية البيضاء والعمامة( فل سووت) على طول اليوم… كان سليمان منقه متعهد ومشرف وجبات الطعام لدى الفرقة… وحكي لي سليمان منقه هذا الموقف بنفسه… سالني عادل امام… ها ياسليمان… ح توكلنا إيه ع الفطار النهار دا؟؟؟؟ قال قلت ليهو بكل بساطه… جنا جداد…
إيه؟؟؟؟ يعني إيه؟؟؟؟؟
قال لي شرحت ليهو وقلت ليهو يعني بيض..
وغالبيةالسودانيين بيقولوا على البيض جنا جداد… وقال لي الحمد لله فطروا تمام… ونسينا الموضوع.. وافاجأ
ليك انو في أمسية نفس اليوم وأثنآء المسرحية شغالة وعند مشهد خروج الأسد ومواجتهه تمامآ مع
سرحان عبدالبصيرعادل إمام فإذا به يخرج عن النص تمامآ بدلآعن صرخته :دا أنا بخاف م الكلب 🐶 يطلع لي أسد:_ دا انا بخاف من الجنا جداد… يطلع لي أسد.
وهنا يرتج ويهتز كل مسرح الجزيرة بالتصفيق
والضحك الشديد…
كل التحية الأستاذ أمير التلب… وعمنا واخونا سليمان منقة .. وأمد الله
في عمر الجميع…….
