بقلم/محمدعكاشة
شقاوتي شقاوة وانا من مرتادي ميكروباصات الطريق الدائري فيصل..يختصر زمني من زحمة فيصل عادي وكبسيبة العشرين والطالبية ففيصل مدينة سودانية تأسست من سوداني الجوه وجداني بريدو.
الشقاوة هي اني لطالما اتحسسُ سودانويتي الحافلةبالأدب والذوق واحترام البشر رفقةُ الطريق.
أكش مرات كتييييرة اذا لقيت سوداني او سودانية اكتر من اتنين علي الميكروباص أو لقيت باب الغرام فاتح.
السودانيين أكترمن اتنين مشكلة بتصرفوا باعتبار إحنا بتوع الاتوبيس.. بالذات في نوع سبهلل يثرثرون بصوت عالي في مواضيع خاصة قد تبلغ بعض الأحيان درجة سيئة..اغلب الاشقاء المصريين يلزمون الصمت اوسماع القرآن حسب السواق ويتكلمون لضرورات او لجمع الأُجرة او رد موبايل كلمتين وغطايتم وبرضو في نوع ناشز بس قليل.
لكن أهلي..البقيف في الدارة اتنبر اقول ديل اهلي هم بالثرثرة والتنبر باللهجة المحلية حسب إذاعةامدرمان.. يظنون ان المصريين لايفهمون لغتنا.
المهم..
الليلة غلبني كِتر عليّا لجهة أن الكائنات التي جاطت الدنيا هذا المساء والسهرة..هن بنات تاشرات سنة كده.. وذوات بشرة بيضاااااء تسر الناظرين ومصارين بُييُيض حتي تشكك الأشقاء المصريين في نسبتهم إلي السودان لولا اللهجة السودانية القُحة..منعول ابو اللهجة ذاتو.. والقُحة ولا صمممت الخشُم.
البنات الحمروات ديل المُتكشفات بشُعورٍ جميلة الليلة وروني العجب ولبس الدهب.
يامؤمن يامُصدق من حوش كوبري الخشب البحوث والناس واقفين طابور بعد المغرب وقت الذروة انتظار مواصلات دائري فيصل لبيني مريوطية.
البنات ديل سون البدع ودقن الطار والزار.. اصوات عالية وحادة الجرس والنبرة..ارفع صوتك هيبة وجبرة.. خلي نشيدك عااااالي النبرة.
حليلووو مهمد ويردي حسب نطق النوبيين..
المهم ديل طالبات جامعيات ما عارف وين بس كلياتهم في المنيل..ده حسب ونستن.
هن ثلاثة.. هديلن جن تلاته من بيت الخياطة.. بس الزولا الاسمها آسماء دي أكثر ابيضاضاً واعلي صوتاً ويبدو انها والثانية جئن زيارة الي الثالثة التي تسكن لبيني فيصل قبل النفق جوار جمعية الانبا انطونيوس الخيرية.
عرفت اسمها لأنها كل مرة وهي بتحكي عاجباها روحها قالت.. انا ذاتي أسماء دي.. زول ماوسيم وحلو مابعبروا ذاتو..
التلاته لسوء حظي احتلن المقاعد الخلفية وضَرررن عيشن..ومن الضحك المتوالي ظرررطن ذاتو..أفتكر كده..
في واحدة زميلتهن بقطعوا فيها قطيعة الجن اسمها رُبا سَلقنها سليقة و دق العيش ليس لأنها تتفوق أكاديميا ولكن لانها تخطف كل حبيب يرعينه.. ياجماعة ده كلام شنو؟
دنقرت مانفع.. بحلقت في المحلات ناس درينك العائلات وعصائر رسلان.. برضو مانفع..
آسماء المفعوصة المهبوشةدي قدمت عرض أثار امتعاض كل الركاب من المصريين وعدد واحد نفر سوداني تعيس هو من يكتب..
السيّدة اسماء وصُويحباتها بصوتٍ عال ولغةٍ مفضوحة.. “داك حبيبي وهو اصلاً صاحب ماما..وماما قالت لي خليك علي الهبشة ماتتمسكي بيهو شديد”
دي هي اسماء دي.
يااهل الخير.. البنات ديل من البحوث لحدي لبيني نضمي وضحكات وقلة أدب.
التفت أول الأمر للتنبيه وانا قدر ابواتم لكن الست آسماء علقت بصورة سخيفة.. ده مالو كمان؟ احترمت نفسي طواااالي وهبشت ليك جيبي افتش الموبايل واللا تاريهو في يدي..جنس بشتنه.
مسكت موبايلي قُلت اتغافل حيث لاينفع..رب ارحمني يوم لاينفع مال ولابنون فالاصوات تصمُ آذان الركاب.
غير كده فاني أحمد الله إني من بيت تربيت فيه علي خفض الصوت واحترام الناس والتربية مِتل حجر المسن صعبه شديد خلاص.
يااخوانا الشعب السوداني الفضل الشتتوا الرصاص ودمعي الغلبوا اللقاط.
خلونا مع اهلنا المصريين ديل نحتفظ ببعض لياقتنا وقيافتنا وظرافتنا وكان الله يحب المحسنين.
