الدكتور علي بلدو استاذ الطب الذي علمني كل شي

بقلم الدكتور/ علي بلدو 

قبل سنوات طويلة و نحن طلاب في كلية الطب جامعة الخرطوم، لمن كانت خرطوم،
المهم؛ دفعة طلبة حلاتنا كدا؛ مشينا مستشفى (التجاني الماحي)؛ منومبسوووووطين لأننا حناخد كورس (الأمراض العقلية والعصبية) في أكبر مستشفى نفسي في البلد.😎
أول يوم كان يوم كحلي علينا كلنا.. دخلنا القاعة التعليمية في انتظار الدكتور الحيدينا المحاضرة وبعدها يودينا العنابر نشوف الحالات على الهواء.
دخل علينا شاب ظريف؛ مهندم؛ ريحة عطره تجيب الرايح؛ وفي عز سخانة الصيف لابس بدلة كاملة بالصديري والجاكت والكرافته؛ وبدون سلام ولا كلام اتجه للبورد.. وملاهو كلو.. شي انجليزي وشي رموز.. وشي رسومات وخطوط..
يقول لينا اكتبوا .. ونحن نكتب ساااااي.
ونحن نكتب؛ ونعاين لي بعض ما فاهمين أي حاجة..
بعد أكثر من ساعة قال لينا:
Did you understand?
بكل براءة جاوبنا:
No
قام خبط الطربيزة لمن قلوبنا وقعت:
How did you not understand? you idiots.
قلنا الليلة سجمنا.. وما عارفين انو سجمنا بالجد ياداب جاي.
أتقدم زول للمنصة؛ والزول دا كان (د. علي بلدو) أستاذ المادة الأصلي؛ لمن لقى الشاب دا بدأ المحاضرة؛ قعد في آخر القاعة براحة وقاعد يراقب فينا.
ونحن المساكين لا بنعرف بلدو ولا بنعرف غيرو..
جا وقف جنب الشاب ودار الحوار التالي:
_Who are you?
=How do you not know me?!
_I know you; just tell them who you are.
=I am Newton; is there anyone who does not know me?

عاين لينا د. بلدو وقال لينا إن شاء الله تكونوا عرفتوا دا منو؟!
وشكر العالم دا.. ونادا الممرضين وجو ساقوهو بالعافية.🙄
عاين لينا د. بلدو عين حمراء وقال لينا:
طلبة نفسانيين وما قادرين تفرقوا بين الدكتور والبيشنت؟😠

طلع الشاب الظريف طالب متفوق بطريقة عبقرية في الفيزياء لمن حير دكاترتو؛ ومن شدة ما اتعمق في الفيزياء جاتو (بارانويا؛ ميغالومانيا).. جنون عظمة خلتو يفتكر نفسه (نيوتن) عديييييل كدا؛ لحدما حياتو اتقلبت وجابوهو مربط التجاني الماحي. 😷

ونحن… الله لا وراكم.. د. بلدو قال لينا اعتبروا المحاضرة اتقدمت؛ وأي زول يكتب لي بحث كامل عن (جنون العظمة) عربي انجليزي.

لكم أن تتخيلوا حجم الورطة والثكليبات والجري في مكتبات العاصمة المثلثة في زمن لا فيهو عمو قوقل ولا إخوانه.😰

المصيبة أنا لساني متبري مني من يومي؛ قلت ليهو بكل ثقة:
وهسي البضمن لينا شنو إنك أنت الدكتور الأصلي.. يمكن بيشنت تاني؟!
عاين لي كدا وقال لي: وعليكي إنتي شرح المحاضرة الجاية.
كان يوم سجم رماد والله🥴

طيب.. أنا هسي تعباااااااانة ودايرة أنوم؛ طريت القصة دي بي وين؟!🤔
يلا.. أنا ما بفسروووو .. وانتو ما بتقصرووووو😉

نسيت حاجة..
قال لينا كمان: يعني لو لاقيتو الزول الإدعى انو النبي موسى كنتو حتآمنوا بيهو يعني😏
ياخي د. بلدو دا خلانا نآمن عديييييييل😂😂😂
استاذي و دكتوري على بلدو
لك كل الشكر لقد درستني و علمتني، ليس الطب وحده و لكن اسلوب للحياة، شكرا فقد علمتني كل شي.
الدكتورة رندا الكاروري
طبيبة استشارية. الولايات المتحدة الامريكية