نائلة فزع.. ياريتني زيك يا طيور

 

شعر/نائلة فزع

يا سما الأفراح لمحتك

وكت زي أطيار مهاجره..

مليانه حب مليانه ريد

ألهمني بهجه ونبض قلب

والليله صغته في شكل خاطره..

أنا جد مناي أفرد جناح

وأبقى زي النسمه طايره..

في المداين وفي البلود

تلقاني ديما هناك مسافره..

أنا جد حسدتك يا طيور

ما إنت حره في حال مجيك

ما إنت حره في حال مغادره..

يا ريت تحسي بلهفتي

وبكل حنين جواي بنزف

تبقي شاعره..

***

أنا في السلاسل والقيود..

أنا في متاهات الوجود..

بحتاج أأشر للحدود..

بحتاج إذن

شان لموطن الأحباب أعود..

***

يا ريتني زيك يا طيور

عايشه في الأجواء طليقه..

لا زول بيمنعني المسير

لا زول بزيف للحقيقه..

***

يا ريتني في اﻷسراب جناح..

يا ريتني نجمه تشع سماح..

يا ريتني بلسم للجراح..

واعيش أوزع في المسرة

وفي المعزة وفي البراح..

والكل يعيش في راحه تامه

ويلبس الأفراح وشاح..

***

يا ريتني زيك يا طيور

منتشره في كل اتجاه..

عمري رغم القُصر يصبح

مصدر سعادة وارتياح….

عنوان مطرز بالأماني العذبه

والحب والحياه..

***

يا بشر أوعاك تعيش

في دنيتك مليان غرور..

وتبقى للأحزان رفيق

وتبقى للآهات أسير..

أوعاك تدمر دنيا للطير الصغير..

***

الحب موزع في الطبيعه..

وليه قواعد في الشريعه..

والحب بيقاتل في الخيانه

وعمره ما رضى بالخديعه..

***

والحب مواطن للجمال..

واحساس موزع في الخيال..

وفي طيبه ننعم بالوصال..

ونعيش بفضله سنين طوال..

في كون بحارب في المخازي

ونفسه يوصل للكمال..

***

نائلة فزع – فرنسا

الأربعاء 11 ديسمبر 2019م