كتب امير احمد السيد :
*دولة امدرمان*
بالله عليكم اذا قررتوا تقسموا السودان ده نحنا عاوزين امدرمان دولة لوحدها .. نحنا كنا عايشين في امدر افضل من كل دول العالم فينا كل الاجناس والمخلوقات من الجن والانس وكل انواع الحيوانات .. عايشين مع بعض متعايشين وبنحب بعض ..
بالله عليكم سيبونا في حالنا نحنا لا من الشمال ولا من الشرق ولا من الغرب ولا من الجنوب نحنا جنس واحد اسمه *اولاد امدرمان*.. عليكم الله خلونا في حالنا نحنا كده مبسوطين وينحب بعض كلنا وجنسنا واحد اولاد قلبا .. فينا المسلم والمسيحي واليهودي والبوذي وفينا اللاديني ذاتو.. عليكم الله خلونا وسيبونا في حالنا .. نحنا ناس دين وناس ادب وناس علم وثقافة ووعي وناس شعر وونسات ولمات بنحب بعض ياخ وبجنون .. من شارع الفيل ليييي حمد النيل ومن احمد شرفي ليييي كل الثورات .. وومن حي الروضه بشارع الوادي والحتانات وود البخيت لييي الجرافات .. ومن كرري لييي الشيخ الطيب والسرواب .. وامبدات للابيض وناس المك ناصر ليي ايد الحد وجبيل الطينة
نحنا لادناقلة لامحس لا حلفاويين لانوبه لادينكا لا مسيرية لا فلاته لا تاما لا برنو لا برتي لا فور لا رزيقيه لا بقاره لا اباله لا بجا ولا بني عامر لا جعليين لا شوايقة لا انقسنا لا شوام لااقباط لا هنود لا افارقة ولا عرب لا ارمن نحنا جنسنا اولاد امدرمان نحنا اولاد قلبا وسنظل اولاد امدرمان نغني الحقيبة وترقص احيائنا كلنا موردة نعشق الحياة ونعشق امدرمان نعم انا اول المؤمنين بان هناك قومية اسمها الامدرمانيين وهي خليط من الحب فقط من الحب
